Il Gup di Udin al à rimandât a judizi cinc personis cu la acuse di fraude in furniduris publichis. Parts danezadis a son siet Comuns furlans e trê venits. La aministrazion comunâl de capitâl furlane e à domandât une indenizazion di 200 mil euros.
Daûr des ipotesis di acuse, intes taulis des scuelis di Udin a rivavin prodots convenzionâi e no biologjics, conzelâts invezit che frescs o di divignince no comunitarie. I plats, dispès di gramature plui basse di ce che al jere fissât, a rivavin a taule tant dopo il confezionament e a temperaduris masse bassis. Par finî, la mangjative pes dietis speciâls e pai celiacs no vignive preparade in maniere separade. Dutis robis no previodudis dal contrat di apalt. E situazions similis si son verificadis in altris sîs Comuns furlans e trê venits. (A.D.G.) – 04.04.2023