Legambiente e à dât cinc bandieris verdis e dôs neris ae mont furlane, un fat che al conte di un mût di viodi une vore diferent su ce che al covente fâ. Di une bande al è cui che al cîr di tignî dongje lis comunitâts, di tutelâ il paisaç e imagjinâ un futûr sostignibil.
Di chê altre bant cui che al è convint che la mont a sedi un spazi di doprâ, di fâ rindi a colps di stradis, implants par schiâ e di events, ancje se no son cuissà ce sostignibii.
Li sbandieri verdis a son ladis a Stefano Floreanini, Giuseppe Tringali e Mario Veluscek, autôr e produtôrs dal docu-film “L’unico Superstite” che, tacant dal glaçâr dal Montâs, al conte lis consecuencis dal riscjaldament globâl.
Bandiere verde ancje pal Comun di Vît par ve inviât il procès partecipatîf inovatîf ArzinOLTRE, chê par visâ Maurizio Fermeglia za delegât dal wwf regjonâl, pal Consorzi vicinâl di Lusniz tal comun di Malborghet e Valbrune par ve savût valorizâ la risultive di aghe solforose garantint ancje la fruizion publiche e par vê difindût il riul Zolf di une gnove centraline idroeletriche e, par finî, al Collettivo Robida di Topolò – Grimac, bon di trasformâ lis cjasis di Topolò intun laboratori permanent di rigjenerazion de mont.
Lis dôs bandieris neris a son ladis invezit ae Comunitât di Mont de Cjargne e aes autoritâts regjonâls che a àn autorizât une manifestazion cui quad dilunc dai trois su la mont in deroghe aes improibizions che a son. Chê altre bandiere e je lade al gjestôr dal ripâr Zacchi di Tarvis, dentri di une aree di protezion, indulà che a son stadis inmaneadis fiestis che a àn produsût une vore di incuinament acustic e che su chês il Servizi forestis e il Cuarp forestâl regjonâl a varessin vût di stâ atents. (a.d.g.) – 18.05.2026
