La conseire comunâl di Pordenon cun deleghe al benstâ animâl, Alessandra Marchi, e à pandût un apel a pro des cisilis par che no sedin fiscâts i lôr nîts: “Al è ben segnalâ cui che al disfe i nîts des cisilis parcè che si trate di un reât. Cui che al ves di fâ une robe dal gjenar al podarès rispuindi di danezament, maltratament e fintremai di copament di animâi”. L’apel al rive dopo che a son rivadis cetantis segnalazions che plui di cualchidun nol à voie di vê i nîts dentri de citât. “No si trate tant di controlâ la situazion tal centri de citât, indulà che ancje i comerciants a son une vore sensibii e atents – e à sotlineât Marchi – cuant che invezit e je in cierts condominis e cjasis, indulà che plui di cualchidun par no vê a ce fâ cuntun pôc di sporc al cîr di parâ vie lis cisilis, une vore impuartantis pal ecosisteme, cuntun compuartaments di salvadi e incivîl”.
Chest an su la fonde dal ultin censiment al somee che a sedin tornadis un pocjis di cisilis in plui, ven a stâi cuindis nîts a pet dai cuatri dal an passât, ma dome cinc agns indaûr i nîts a jerin passe cuarante. (a.d.g.) – 03.06.2025
