Il “Festival dal Cine Mut” di Pordenon al è il plui antîc de regjon dedicât ae “setime art” e si ten dal 1982. A Udin al è il “Far East Film Festival”, dedicât al cine popolâr dal Orient lontan, che al va indevant dal 1999. Po dopo al è il “ Trieste Science+Fiction Festival”, tacât tal 2000, ma che al è une ereditât drete dal preseât Festival Internazionâl dal Cine di Fantasience, durât uns vincj agns dal 1963. Dai 3 al 8 di Novembar, La Cappella Underground e puarte lis miôr produzions dal gjenar fantastic sul schermi grant, cun passe 60 primis visions nazionâls e internazionâls, cun regjiscj, atôrs e autôrs di dut il mont. Il Politeama Rossetti al ospitarà i cines in concors e lis e anteprimis fûr dal concors, invezit il cine Ariston al presentarà une selezion di peliculis che a van dai curtmetraçs ai documentaris, fint ai classics restaurâts. Po dopo e je la “Sci-Fi Dome” in Piazza della Borsa, dulà che si davuelzaran ducj i altris events e la Sala Xenia pai incuintris dedicâts ae leterature di gjenar, ai zûcs di taule e ai fumets. La vincjesime seste edizion dal Festival di fantasience di Triest si vierç martars ai 3 cun “The Squirrel”, ambientade intun futûr cence plui la nature, e si sierarà cun “Bucking Fastard” di Werner Herzog, il gnûf cine visionari dal mestri dal cine contemporani. (A.I.) – 02.11.2026
Foto di M. Smeds
