Mandi Runjaic, al rive un altri alenadôr

La partide pierdude par 2-5 in cjase la sere de vilie de fieste di Ducj i Sants e je costade une vore a Kosta Runjaic, l’alenadôr che al à vuidât l’Udin dal Istât dal 2024. Fint a calchi setemane indaûr, al è stât preseât (no di masse di lôr…) par vê salvât la scuadre doi agns un daûr di chel altri cence patî masse, ma al è stât criticât di ancjetancj, massime di chei che no i àn mai fat passâ chê di no vê imparât a fevelâ par talian. Dopo di vê tirât dongje dome une vitorie e dôs patis, ma soredut siet partidis pierdudis e dome un pont tes ultimis vot zornadis di campionât, il tecnic al è stât parât vie domenie di sere. La gnove e je deventade uficiâl dome lunis ai 2 sot sere, stant che lis dôs parts a vevin ancjemò di decidi alc: cuistions di contrat e forsit ancje di bêçs, stant che Runjaic al podarès tornâ in Polonie e cjatâ daurman un puest a alenâ la scuadre nazionâl di chel paîs. Al so puest – ma ancje chi e mancje ancjemò une comunicazion uficiâl – al rive il venit Paolo Zanetti, pront a alenâ la scuadre a tacâ di martars ai 3– stant che lunis e je stade dade une zornade di libertât – par prontâ une partide che e somee za a une dispate che di vinars che al ven cuintri la sô ex scuadre, il Vignesie. (A.I.) – 02.11.2026