Il Folk Club di Buri al torne cjase

Tal dissen cul non de associazion al è ancjemò il tor dal cjampanili cul orloi ribaltât, propit chel di Buri. Alì tal 1990 un grup di passionâts al veve creât il “Folk Club Buttrio”, puartant par cetant timp une schirie di artiscj di chenti e dal forest a sunâ intun ambient innomenât dal paîs, che magari cussì no nol è plui. Di agnorums il Folk Club vuidât di Marco Miconi, un dai cinc che lu vevin fondât, al puarte ator pal teritori lis sôs propuestis: massime folk des Isulis Britanichis, la sô passion. Lunis ai 26 il Folk Club al torne “a cjase” par une sere, tal Palafeste, par un conciert a jentrade libare cence sore nuie di une formazion buride di une liende dal folk rock inglês, il grup Oysterband, nassût 50 agns indaûr, tal 1976. Passâts pal Friûl uns vincj agns indaûr, i Oysterband a vevin sierât la lôr storie tal 2022, ma trê di lôr a àn decidût di tornâ a sunâ dal vîf il materiâl plui preseât dai passionâts di folk britanic. Dongje dal cjantant John Jones al è Ray Cooper – tal grup dal 1990 cun bas e violoncel – e a completâ il tercet il ghitarist e produtôr Al Scott. (A.I.) – 25.10.2026