Daspò dîs agns al è rivât il prin verdet dal procès fat pe muart di Giulio Regeni, il zovin ricercjadôr furlan copât in Egjit daspò ve patît torturis che no si puedin nancje pensâ.
La Cort di Assise di Rome e à condanât trê agjents dai servizis segrets egjizians par vê rapît, torturât e copât il zovin al Cairo tal 2016, indulà che si cjatave pai siei studis. Un altri agjent che al jere imputât al è stât invezit sfrancjât.
I trê a son stâts condanâts a 10 agns di preson, che magari cussì no, no fasaran parcè che il Guvier egjizian nol à mai colaborât cui judiçs talians par cirî di cjapâ i sasins di Giulio: si trate dal maiôr Magdi Ibrahim Abdelal Sharif – che par lui la Procure e veve domandât l’ergastul – e i colonei Uhsam Helmi e Athar Kamel Mohamed. Il cuart imputât, il gjenerâl Tariq Sabir, invezit al è stât sfrancjât des acusis.
Intant a fasin discuti lis declarazions fatis dal nestri ministri dal Forest Antonio Tajani che al à dit che lis colpis dai trê no puedin colâ sul Stât dal Egjit. (a.d.g.) – 29.09.2026
