Jazz, tradizions e tango cun Fresu-Di Bonaventura

Une serade dedicade al incuintri di lenghis e tradizions musicâls si davuelzarà miercus ai 30 aes 8 e mieze sot sere tal Auditorium “Concordia” di Pordenon. Sul palc di sene par un spetacul inmaneât de Academie di Musiche “Naonis”, i artiscj di innomine internazionâl Paolo Fresu e Daniele Di Bonaventura, doi dai artiscj plui stimâts dal jazz talian e internazionâl, a presentaran “Vino Dentro” (Vin dentri), adun cu lis arcs de Academie di Musiche di “Naonis” direts di Valter Sivilotti. “Vino Dentro” al ufrîs un viaç musicâl che al instrece jazz, tango, riferiments ae tradizion sarde, musiche sacre e opare, valorizant l’incuintri di esperiencis e lenghis diviersis. Il progjet al è leât al cine cul stes non dal regjist Ferdinando Vicentini Orgnani, pal cuâl Paolo Fresu al à componût la colone sonore. Lis composizions a saran interpretadis di Fresu ae trombe, Di Bonaventura al “bandoneon” (la armoniche doprade pal tango argjentin) e al piano, cul compagnament orchestrâl. (A.I.) – 29.09.2026