Ancje chest an, pe Zornade Europeane des Lenghis, in gracie dal event “Imprescj digjitâi pes lenghis minoritariis: esperiencis, strategjiis e gnûfs senaris” si à rinovât il confront tra identitâts linguistichis e inovazion tecnologjiche, un apontament che la ARLeF – Agjenzie regjonâl pe lenghe furlane e la aziende Beliven a àn volût a fuart.
La iniziative e fâs part di un progjet plui grant, clamât LeNGaçS – acronim di Lenghis, iNovazion, tecnoloGjiis e impreScj, che al met in rêt teritoris, istituzions, competencis e realtâts tecnologjichis impegnadis tal valorizâ lis lenghis minoritariis midiant de inovazion digjitâl. Un troi di puartade europeane che, partint dal Friûl, si vierç al confront cun altris comunitâts linguistichis de Europe, prudelant il scambi di esperiencis, strategjiis e buinis pratichis, daûr dai principis dal plurilinguisim e de valorizazion de diversitât linguistiche promovûts dal Consei di Europe e de Comission Europeane propit cu la istituzion de Zornade des Lenghis.
La iniziative, là che a àn partecipât istituzions, aziendis e professioniscj, e je stade metude in vore in colaborazion cu la Regjon Autonome Friûl-Vignesie Julie, la INSIEL, la Ripartizion Aministrazion scuele e culture ladine te Provincie autonome di Bolzan e Lia Rumantscha, istituzion che e je ative a pro de lenghe e de culture rumance, in plui che lis aziendis tecnologjichis BIPxTech (partner di Google Italia), DITEDI, evoseed e infoFactory.
La edizion 2026 e à vût tant che teme centrâl lis lenghis retoromanichis: furlan, ladin e rumanç. Lenghis cun lidrîs in comun che vuê a spartissin une sfide straordenarie pal lôr avignî: restâ vivarosis e integradis ad implen te ete digjitâl. La tecnologjie, duncje, e je par dutis trê un catalizadôr strategjic di inovazion. (a.d.g.) – 28.09.2026
