Doi incidents mortâi vie pal fin de setemane su lis nestris stradis. Il prin al è sucedût tal dopomisdì di domenie ai 27 di Setembar a Sapade, in borc Lerpa, indulà che Laura Duramonti di 48 agns, che e viveve a Tresesin e mari di doi fîs, e je muarte daspò che la moto che e jere vuidade di un om bande Sapade e je lade cuintri di une auto ae altece di une curve.
La femine che e viazave daûr, par vie dal impat e je stade sbalçade di passe trente metris che il so cuarp al è lât a sbati cuintri di un arbul tant che e je muarte sul colp. Une vore grâf il vuidadôr che al è stât puartât cul elicotar tal ospedâl di Udin. La strade regjonâl 355 e je restade sierade al trafic par plui di dôs oris.
Che altri incident mortâl al è sucedût vie pe sere di sabide ai 26 di Setembar dilunc de strade provinciâl 68 tal Comun Flumisel Vile Visintine, indulà che Riccardo Brescia di 26 agns dal puest, al à pierdût il control de sô moto lant fûr strade.
Dai prins aciertaments no saressin cjapâts dentri altris mieçs e il fat che al sedi lât a finî intun bosc al à complicât lis operazions dal personâl di socors che lu à cirût par cetancj minûts prime di rivâ a cjatâ il zovin. Lis manovris par cirî di salvâlu no son servidis e il miedi al à scugnût declarâ la sô muart. (a.d.g.) – 28.09.2026
