Socors alpin in azion îr sere su la mont Duran, tal teritori dal Comun di nert e Cjas, indulà che dôs escursionistis a jerin restadis blocadis par vie dal fat che al jere vignût scûr. Lis dôs feminis di 25 e 30 agns, di Pordenon, si jerin blocadis tra i 2.300 e i 2.400 metris di altece parcè che lant ju peadis cu la cuarde no rivavin plui a viodi cun sigurece il percors dilunc dal cret, cundut che a vevin ancje lis lampadis.
La domande di jutori e je stade fate tor des 10 e mieze sot sere dal gjestôr dal ripâr Maniago che al jere in contat cu lis escursionistis doprant Wapp.
I tecnics dal Socors alpin de stazion Valcellina a àn clamât daurman l’elisocors che in pôc timp, ancje in graciis des coordenadis e de fuarte lûs de lune plene, a son stadis cjatadis e tiradis su cu la binte.
Lis operazions di socors a son finidis tor de une di gnot. (a.d.g.) – 28.09.2026
