Lis “presincis” di un pitôr a cjase sô

Nassût tal 1956 a S. Vît dal Tiliment, pitôr autodidat a tacâ de fin dai agns 70, Marco Tracanelli al fronte di simpri il teme dal timp, de memorie, de pierdite e de relazion dal om cu la comunitât: no dome cu la piture, ma ancje cun lavôrs di art ambientâl creâts a pueste sul teritori, simpri lant daûr une riflession estetiche personâl. Di vinars ai 25 e fint ai 11 di Otubar, la citat là che al è ancjemò a stâ e ospite une sô mostre personâl tes antighis presons. “Presenze”, presincis. La sielte dal lûc no je stade fate a câs, ma par marcâ il rapuart propit cul argoment des oparis, che a rapresentin figuris che a son sul ôr, ma atentis, buinis di dâ scolte e cure, empatie e compassion. Intun mont di esposizion digjitâl esagjerade, l’autôr al sielç la dignitât di cui che al stâ tal cidinôr, intun lûc platât tant che la preson, ma a rive ancjemò a sintî il duliment di chei altris. Lis figuris dai cuadris sielzûts a vegnin fûr di un lûc che nol è e propit par chel a son ancjemò plui presintis. (A.I.) –