In Argjentine, su lis olmis di un sienziât furlan

“Un grant sienziât furlan, ma ancje un simbul di unitât dai teritoris cu lis personis, che nus ricuarde cetant che lis nestris lidrîs a puedin jessi fondis e, tal stes timp, trop grandis che a son”. Chestis a son stadis lis peraulis dal conseîr regjonâl Moreno Lirutti daspò di vê partecipât ae scree de mostre “Egidio Feruglio: un sienziât jenfri il Friûl-Vignesie Julie e la Patagonie”, dedicade al gjeolic, sienziât, esploradôr e naturalist furlan, che e va indevant fint ai 11 di Otubar a Felet. “La storie di Egidio Feruglio – al sclarìs ancjemò Lirutti – e mostre cemût che il Friûl al è rivât a puartâ ator pal mont no dome il lavôr e lis abilitâts imprenditoriâls, ma ancje la culture, la ricercje e la cognossince. Tornâ a discuvierzi une personalitât tant che la sô al vûl dî valorizâ un cjapitul impuartant de nestre storie e tal stes timp rinfuarcî il dialic cu lis comunitâts furlanis che, vie pal timp, si son compenetradis in Argjentine”. Intai mês che a vignaran, il conseîr al previôt che al sarà inmaneât propit in Argjentine un grant event sientific, in coincidence cu la mission Trelew-Esquel-Buenos Aires di une delegazion furlane. (A.I.) – 28.09.2026