Lignan: dut al è pront pe “invasion” dai motârs

Vie pai agns, a àn fat deventâ Lignan une sorte di “Daytona europeane”, ven a stâi il lûc plui innomenât pai events leât ai motôrs, autos e motocicletis. I motârs no son plui che di une volte, ma la trentesime novesime edizion de “Biker Fest International” che si davuelzarà di joibe ai 15 fint a domenie ai 18 di Mai te localitât turistiche plui innomenade dal Friûl, e je plene come simpri. Cussì plene che l’an passât e è contât passe 240 mil presincis: nissun, in Europe, al è mai rivât a chescj numars, dome la Americhe di Sturgis e Daytona! L’event european “di riferiment” par cui che al dopre e al preferìs lis motos “custom” al viôt al centri il “Custom Bike Show” di dute Europe, ma ancje une schirie di “events tal event”: i concierts, la “U.S. Car Reunion”, la “50cc Fever Fest” pai motorins plui piçui e ancje un spazi impuartant pai motôrs eletrics, dut tal “borc dai motârs”, tes areis verdis e ancje tal marcjât dongje dal stadi “Teghil” e li dai baracons. La novitât di cheste edizion e je la gnove aree Libris Art e Culture tal PalaPineta, là che si cjataran i editôrs indipendents plui impuartants dal Friûl-Vignesie Julie, dongje des miôr librariis talianis specializadis tal setôr moto e auto. (A.I.) – 14.05.2025