Di dodis agns, Bruna Braidotti e à tacat cu la sô compagnie “Di arti e mestieri” une esplorazion dal teatri feminin cuntune rassegne in dute in provincie di Pordenon, “La scena delle donne”, la sene des feminis. Une celebrazion de creativitât feminine, vierzint gnûfs spazis di vision e di confront jenfri gjenerazions diferentis di autoris, scritoris, regjistis e atoris, par contrastâ la disparitât di gjenar che si cjate ancjemò tal teatri contemporani.
Cence lâ daûr di un teme ugnul, la rassegne e ufrìs 25 spetacui fint ai 3 di Dicembar: teatri ma ancje leturis, presentazions di libris e alris events par contâ storiis di mît o dal dì di vuê, di striis e di sienziadis dismenteadis, di zoventû e dal dirit di deventâ vecjis: in struc, des feminis che a àn fat la storie cence vê lassât une olme che si pues viodi.
Nûf i spetacui teatrâi, cuasi ducj a Pordenon, tal ex convent di S. Francesc o li dal Capitol, cuntune seconde part tal 2027 fint al mês di Març. Ai 29 di Otubar e rive Cinzia Spanò, une des artisis plui innomendis dal teatri civîl talian cun “Esagaerate!”, po dopo “Il trasloco”di Caterina Casini ai 5 di Novembar e il Playback Theatre doi dîs dopo, Emanuela Grimalda cun “Dio è una signora di mezza età” e “Hedy Lamarr, una donna tra genio e bellezza” la stele di Hollywood che cualchidun al cognòs no dome par jessi stade “la femine plui biele dal Mont”, ma ancje pai siei merits te sience! (A.I.) – 28.10.2026
