Sigurece par ducj, ancje pai motocicliscj

Lis clamin barieris di sigurece, ma cheste definizion e lave ben forsit 40 agns indaûr. Di chê volte il trafic al è cressût e, chest al è il dât che al varès di dâ plui pinsîr, ancje il numar di chei che a vuidin un scooter o une moto.
Trops? Plui o mancul 150 mil inte nestre regjon (dâts Aci), numar che nol cjape dentri i motorins di 50 centimetris cubis. Alore no si rive a capî par cuâl motîf che no si doprin barieris buinis di salvâ la scusse ancje di chei che a van su lis dôs ruedis. Il probleme dai guard-rail al è che se il cuarp al va a sbati cuintri dai palets che a tegnin sù la bariere orizontâl, si sdrume. Al è stât pierdût il cont di trops che a son muarts o che si son crevâts lis gjambis o, piês, la schene.
Po ben, cundut che di chest probleme si fevele di agns e che di timp lis associazions che a cjapin dentri i motocicliscj a domandin di fâ alc, o sin ancjemò in spiete di normis che a metin l’oblic di instalâ une altre fasse di sigurece e par cuvierzi chei maledets palets. A son passâts cuasi trê agns di cuant che, tal Fevrâr dal 2024, un emendament al impegnave il Guvier a mandâ fûr un decret legjislatîf dedicât aes infrastruturis stradâls che al veve dentri ancje indicazions precisis.
Un an dopo, il president de Federazion motociclistiche taliane (Fmi) al ringraciave il ministri des Infrastruturis e dai Traspuarts, Matteo Salvini, pe atenzion su la cuistion, visant che al spietave il decret su lis barieris. No savìn par colpe di cui al è coventât tant timp, ma chel decret al è rivât dome tal Jugn di chest an e cumò si spiete che simpri il stes ministeri al dedi fûr lis liniis vuide su la gjestion e il control dai dispositîfs di sigurece.
Al somee dut câs che la Regjon e vedi cjapât a cûr la cuistion, tant che su propueste de assessore aes Infrastruturis, Cristina Amirante, la Zonte regjonâl e à aprovât ai 3 di Otubar la delibare che e previôt il stanziament di 4 milions e 880 mil euros a pro di FvgStrade pe manutenzion straordenarie des barieris di sigurece. Dentri di chescj lavôrs, al è stât risiervât un milion di euros pes barieris Dsm (Dispositîfs salve motocicliscj) e il prin intervent al sarà fat dilunc de Strade regjonâl 512 tra Cjavaç a Trasaghis.
“Chescj intervents nus permetaran di prevignî – e à sotlineât Amirante – fats dramatics come chel sucedût a Mestre (indulà che une coriere e jere lade jù di un sorepàs, ndr), ancje parcè che il Ministeri des Infrastruturis e dai Traspuarts al à mandât fûr une circolâr une vore rigorose par che e sedi fate une ricognizion puntuâl de situazion e al sedi inviât un mecanisim di manutenzion ancjemò plui incisîf”.
Cheste sume e je plui alte di ce che al jere stât previodût par chest an e si zonte ai 8 milions spindûts tal 2025 par fâ i intervents plui urgjents. Cumò si sta studiant par decidi la scjale di prioritât dai intervents, in spiete che il ministeri roman al mandi fûr lis liniis vuide, ma al ven di pensâ che se al è svelt te scriture de circolâr come pal decret al tocjarà spietâ ancjemò altris mês, simpri che intant no rivedin lis elezions. (a.d.g.) – 28.10.2026