Il Club alpino italiano dal F-Vj e Asca, la associazion tra lis sezions dal cai dal Friûl Alt a àn scrit che no son dacuardi sul fat che a sedi autorizade la manifestazion motoristiche che par trê dî, a Setembar, e varès di fâ lâ atôr dilunc pistis forestâls in areis sot tutele, come Natura 2000, zonis a protezion speciâl e zonis di conservazion, motoretis cun cuatri ruedis (quad), che par chel al covente la autorizazion de Comunitât de Mont de Cjargne.
“A son cetantis lis motivazions cuintri de autorizazion – si lei tal document firmât di Giovanni Duratti, president dal cai dal F-Vj -. Fa une deroghe par judâ une manifestazion, fûr di cualsisedi regule o progjet, al vûl dî creâ un precedent pericolôs, che nol puarte nissun vantaç aes economiis locâls e al declasse la mont a un luna park par un divertiment beche e scjampe… Il percors – al scrîf ancjemò il Cai – al passe in cetancj puescj ad alt, habitat di faune che e sarès a risi metint in pericul ancje l’om parcè che lis bestiis spaventadis dal rumôr e podaressin lâ su la viabilitât ordenarie”.
Il Cai si declare disponibil a dâ une man par cjatâ il compromès just, se dal câs individuant dai percors cun vuidis acreditadis dilunc dal an cuant che no si met in pericul la faune salvadie e controlant che a sedi rispietadis lis prescrizions dilunc e dopo de manifestazion.(a.d.g.) – 28.07.2025
