Ae vilie de partence dal Zîr di Italie, dubis si impenzissin ator de penultime prove de corse colôr di rose, la cronoscalade de mont sante dal Lussari. A tirâju sù a son stadis ciertis scuadris, che a àn scomençât a discuti la regolaritât de rive sù.
Il motîf de contrarietât? Il fat che, tant che previodût e valutât di timp, su chê rive sù no saran lis amiraliis, ma lis motos a lâ daûr dai coridôrs pe assistence.
A alçâ par prin la cuistion al è stât un sît belghe e ancje Remco Evenepoel, un dai candidâts ae vitorie finâl, che îr ae tv belghe al à declarât di jessi maraveât “di tant che dome cumò la organizazion si sedi acuarte dai problemis”.
Stant a chel che si sa, la Union ciclistiche internazionâl e à inviât cualchi timp za fa une domande di sclariments ai organizadôrs, dant dopo il vie libare ae tape. Si fevelarà vuê di chest inte riunion tecniche pre-zîr tra organizazion e diretôrs sportîfs. (A.D.G.) – 05.05.2023
