Udin: aur e acuile pe tierce maiute

La scuadre dal Udin e à presentât la tierce maiute dal campionât a pene tacât, un altri esempli di mode e sostignibilitât tal balon, daûr dal progjet che la societât e puarte indevant di cualchi an adun cu la Macron. Ancje cheste volte la maiute e je stade fate in colaborazion cul “Camera Moda Fashion Trust”, un grup che al cîr e al valorize talents zovins de mode. Daspò di Flora Rabitti l’an passât, cheste volte al è stât sielzût Domenico Orefice, nassût tal 1997, che al à presentât la gnove maiute dal Udin te suaze de “Milano Fashion Week”, la setemane de mode di Milan. Il colôr al à zâl aur, ma cuntun cuel a polo blanc e neri e cu la acuile stilizade daûr e devant. (A.I.) – 25.09.2025