L’Udin za in ritîr al presente joibe la gnove maiute

Domenie di sere, cuntune cene in presince dai zuiadôrs, dal alenadôr e dai dirigjents intal ristorant dentri dal stadi “Friuli”, e je partide in maniere ‘informâl’ la gnove stagjon dal Udin. Di vuê a domenie, il ‘pre ritîr’ si davuelç intai implants dal stadi, prime dal trasferiment in mont dai 17 di Lui, in Austrie a Bad Kleinkirchheim. Joibe ai 13, aes 8.30 sot sere, la presentazion de campagne abonaments pal campionât 2023-24: une serade speciâl inte suaze dal Salon dal Parlament dal Cjistiel di Udin. Intal cors dal avigniment, e sarà pandude ancje la gnove maiute dai blancs e neris – simpri firmade de Macron – pe gnove stagjon. (A.I.) – 10.07.2023