Visavì, la danze e passe i confins

Cuarte edizion par “Visavì Gorizia Dance Festival”, la rassegne di danze contemporanie di Gurize e Nova Gorica ideade di ArtistiAssociati, che si fasarà dai 11 ai 15 di Otubar. Il diretôr artistic Walter Mramor al à preparât un program siôr: dîs spetacui, trê avigniments speciâi, une gare, une cunvigne, une anteprime, doi laboratoris, in dîs lûcs diferents di cuatri Comuns, cun dodis compagniis di Italie, Slovenie, Cravuazie, Malte e Israêl. Il program si vierç ai 11 di Otubar al Kulturni Center Lojze Bratuž cuntun spetacul dedicât ai fruts, “La casa del panda”, e al va indevant cu la prime di “Distance” tal Teatri Nazionâl di Nova Gorica. Joibe ai 12, il Kulturni Dom di Gurize al ospitarà “Un protagonista discreto” di Alessandra Paoletti e Damiano Ottavio Bigi, e il “Verdi” di Gurize la prime assolude di “Cultus”, la gnove creazion di Roberto Zappalà. (A.I.) – 10.10.2023