Suns Europe: une vitorie che e ven di lontan

Dania O. Tausen des lontanis isulis Føroyar e à vinçût ae unanimitât (di public e di jurie) la novesime edizion di Suns Europe, il festival des arts in lenghe minorizade organizât de cooperative Informazion Furlane. Al concierton di sabide ai 14 al Teatri gnûf ‘Giovanni da Udine’, lis sôs cjançons, piçulis cronichis cuotidianis tra pop, soul e rock, a son stadis premiadis sedi dal public in sale, o di cui che al scoltave di cjase in streaming, sedi de jurie internazionâl, “pe sô biele vôs e pal mût di interpretâ la sô Tiere – cheste e je la motivazion –  e par jessi rivade a mandâ al public la magjie des sôs isulis cu la lôr tradizion”. Il premi Altre Europe al è stât assegnât invezit al Babel Film Festival di Casteddu/Cagliari, e consegnât a Paolo Carboni, regjist e diretôr artistic de rassegne. (A.I.) – 16.10.2023