La stagjon dal “Bon” e tache adore e fûr di abonament

Prime di tacâ in maniere uficiâl la gnove stagjon, la Fondazion “Luigi Bon” di Culugne e ufrîs une anteprime, une “Overture” tal mês di Otubar, cun sîs events fûr di abonament che a cjapin dentri danze, opare, musiche e divulgazion sientifiche, il gnûf program culturâl dal Teatri “Luigi Bon” a Culugne e dal Teatri “Paolo Maurensig” a Felet. Si scomence vinars ai 9 tal “Maurensig” cun “Off Label – Rassegne par une gnnove danze”, prodote de compagnie Ararea. La serade e sarà dividude in trê parts, cun trê spetacui diviersis titulâts “Butterfly”, “Anime” e “Homing_estratto”. Il dì dopo, di gnûf tal teatri di Felet, “La storia de La Traviata”, un adatament dome intun at de opare mestre di Giuseppe Verdi, curât di Andrea Stanisc par presentâ al public, soredut aes gjenerazions plui zovinis, il podê dramatic e musicâl di Verdi. La rassegne va indevant tal Teatri “Bon” cun doi events musicâi: sabide ai 17, il Rapsodia Saxophone Quartet, ven a stâi cuatri musiciscj zovins dal conservatori “Jacopo Tomadini” di Udin; sabide ai 24 il Trio Vega e ai 31 il Duo Palomar. Ae di Otubar, la prose e la sience a saran protagonistis miercus ai 28 tal Maurensig cun “RiconoScience – La sience contade di chei che la vivin”, cun Mauro Ferrari e Piero Sidoti. (A.I.) – 05.10.2026