La sinfoniche regjonâl pronte par zirâ la Italie

La FVG Orchestra e je pronte par partî par une tournée taliane di cuatri concierts impuartants, intun cul zovin talent dal piano Gabriele Strata e cu la direzion di Paolo Paroni. I concierts, dai 12 ai 15 di Otubar, si tignaran tal Teatri dai Marsi di Avezzano, tal Teatri Massimo di Pescara, li dal “Savoia” di Campobasso e tal Teatri Comunâl di Sulmona. La tournée e fâs part dal progjet “Giovani talenti musicali italiani nel mondo”, che al nas di une sinergjie e al à l’obietîf di favorî la jentrade intal mont musicâl nazionâl e internazionâl dai miôr zovins talents talians: tant che Gabriele Strata, nassût intal 1999, un dai pianiscj emergjents de sô gjenerazion. Chescj apontaments a confermin il valôr de sinfoniche regjonâl che, dopo il ricognossiment di bande dal Ministeri de Culture intal 2022, e à vût un Istât plen di sucès, tant che l’omaç a Lelio Luttazzi e il grant conciert “Police deranged” par Udin&Jazz. (A.I.) – 10.10.2023