E je la corâl di musiche gospel plui famose de Americhe, une di chês plui innomenadis in dut il mont, di passe 30 agns su lis senis. Nassût intal 1986 in graciis di Allen Bailey pes celebrazions in onôr di Martin Luther King, l’Harlem Gospel Choir al è formât des vôs plui rafinadis e dai miôr musiciscj des glesiis ‘neris’ di Harlem e di New York. La Italie al è un dai paîs plui amâts de corâl americane, che e torne sui palcs di doi teatris de regjon: martars ai 12 al Teatri Gnûf “Giovanni da Udine”, za dut plen di mês, e miercus ai 13 a Triest al Politeama Rossetti. La uniche corâl gospel tal mont a vê cjantât par doi Papis, doi Presidents dai Stâts Unîts di Americhe, la Famee Reâl inglese e in avigniments di rilêf mondiâl, e presentarà ancje un tribût speciâl a Whitney Houston, la stele dal pop che e varès fat 60 agns. (A.I.) – 11.12.2023
Foto di S. Di Luca
