Lignan si prepare pe Pasche di Mai e cussì a stan fasint lis istituzions che a lavorin inte sigurece.
Vuê, dilunc de riunion dal Comitât provinciâl pal ordin e la sigurece publiche, clamât dongje intal municipi di Lignan dal Prefet di Udin, Domenico Lione, ae presince ancje dal cuestôr di Udin Alfredo D’Agostino, dal sindic de citât balneâr Laura Giorgi e dal assessôr regjonâl ae Sigurece Pierpaolo Roberti, al è stât decidût di inmaneâ servizis straordenaris, cun plui personâl dilunc di dutis lis 24 oris de zornade e il rinfuarç dai reparts speciâi tacant de Pasche di Mai, cuant che a Lignan a rivaran ju’ miârs di zovins soredut di Austrie e Gjermanie. Par programâ i servizis dai 16 ai 20 di Mai, il cuestôr di Udin al à clamât adun pe prossime setemane une taule tecniche.
Ancje de bande de Regjon a saran fats invistiments a pro de ativitât di vigjilance par garantî la presince plui fuarte dai pompîrs cun personâl permanent dilunc dal Istât. Massime atenzion ancje par ce che al tocje i mieçs dal traspuart public locâl. Inte foto une patulie di poliziots talians e austriacs a Lignan intal 2023. (a.d.g.) – 07.05.2024
