Il gnûf cuartet di Glauco Venier al festival jazz di Polcenic

Za rivât ae cuinte edizion, “Jazz River” al è un festival musicâl firmât dal circul Controtempo di Cormons: un flus di musiche daûr dal flum che al travierse lûcs e comunitâts creant conessions, emozions e dialics. A Polcenic e di chest an ancje a Sacîl (là che plui indevant al rivarà ancje “Il volo del jazz”) a saran no dome concierts, ma ancje teatri, leterature, art… In dut, 20 apontaments di joibe ai 11 e fint ai 20 di Setembar, tacant di “Armonie in codice” cul piano di Gianni Della Libera e lis pituris di Alberto Della Libera. Par chel che al rivuarde i concierts jazz, il pianist jazz e compositôr furlan di innomine mondiâl, Glauco Venier, al presente il so ultin disc fat cul Cuartet gnûf (Mirko Cisilino, Alessio Zoratto e Marco D’Orlando), intant che i ospits talians a son il trombetist Fabrizio Bosso e il ghitarist Bebo Ferra. Tal rest dal program, un spetacul di teatri e musiche inspirât aes contis di Stefano Benni, cul tercet jazz Lune Troublante, i intervents di Andrea Bellavite e Giorgio Alberti e il duet austriac BartolomeyBittman (violoncel e violin), che al sunarà musiche rock cun struments de tradizion classiche. (A.I.) – 10.09.2025