I ‘artesans dal teatri’ pronts pal lôr prin spetacul origjinâl

A àn tocjât cun man e cognossût i “segrets” di senografie, tecniche e machinis, ma ancje di costums e sartorie, cussì tant che truc, lûs, implants, musichis di sene, efiets sonôrs, la gjestion dal public, la organizazion… In pocjis peraulis, a àn imparât “cemût che al funzione il teatri” e cumò a son pronts a presentâ al public il propri lavôr origjinâl. Miercus al 1n di Març, aes 7.30 di sere al Teatri Odeon di Tisane, cu la regjie di Francesco Accomando, al rive “Sogno, teatri abbandonati al tempo del Covid”, il spetacul che al siere “Mestieri di scena”, il progjet che al à savût meti adun artesanât e creazion artistiche in graciis dal Teatro Club di Udin, cu la poie de Regjon e de Fondazione Friuli e in colaborazion cun Confartesanât di Udin, Ert Fvg e la Fondazion Teatro Nuovo “Giovanni da Udine”. Ai 6 di Març la repliche a Udin. (A.I.) – 27.02.2023