Dome cent biliets par viodi Tony Hadley a Cividât

Joibe ai 4 e tache a Cividât la prime edizion dal“Hello Summer Fest”, une gnove rassegne cun nons talians e internazionâi de musiche – e no dome – ideade di The Groove Factory cu la aministrazion comunâl, in colaborazion cun VignaPR e FVG Music Live. Si tache in place Domo, il lûc di partence dal itinerari dal Unesco “I Langobarts in Italie, i lûcs dal podê”, cuntun conciert speciâl di Tony Hadley, che al fasarà fieste pai 45 agns de sô cariere, cjantant i sucès siei e dal so grup storic, i Spandau Ballet, ma ancje cualchi cjançon gjavade fûr dal repertori di altris e che e je te storie de musiche. I ultins cent biliets (de uniche serade di cuatri a paiament) a son ancjemò di vendi in rêt su Ticketone.it. Vinars ai 5 il festival al varà une propueste pai plui zovins: il conciert di Benji & Fede, za dut plen in prenotazion di cualchi dì. Sabide ai 6 e sarà une serade di comics dai programs plui innomenâts de television: Paolo Migone, Daniele Raco, Marco BAZ Bazzoni e Leonardo Manera. Domenie ai 7 si siere cuntun grup “di cjase”, la Rhythm and Blues Band, nassude 45 agns indaûr propit a Cividât. (A.I.) – 03.09.2025