Dissens animâts ‘di autôr’ a Pordenon

Al va indevant a Pordenon, miercus ai 15, il “Piccolo Festival dell’Animazione” (“Piçul Festival de Animazion”), la rassegne dedicade ae ilustrazion e ae animazion di autôr, organizade de Associazion Viva Comix cu la direzion artistiche di Paola Bristot. Tra i ospits di miercus, li dal Cinemazero, Stefano Tambellini, in gare inte sezion principâl (“main competition”) cuntun cine in anteprime mondiâl, “Impossible Maladies”. Cu la sûr Alice, Stefano al à scomençât a fâ curtmetraçs ancjemò prins di notâsi intes scuelis, dulà che a varessin imparât il mistîr de animazion: vuê a son tra i pôcs in Italie a doprâ cheste tecniche di animazion in “stop-motion”. Inte Glesie di Sant Laurinç a S. Vît dal Tiliment, tra lis passe 100 imagjins in esposizion, al è ancje il set dal cine. Tra chei altris ospits de zornade, la animadore russe Natalja Chernischeva e la slovene Pika Potocnik. (A.I.) – 14.11.2023