Conciert pai 102 agns dai “Amîs de musiche” di Udin

Ogni an, i “Amîs de Musiche” di Udin a celebrin cuntun avigniment la date simbul de nassite dal sodalizi, che al è rivât ai 102 agns di ativitât. Pal 2024 al è stât sielt un interprete di innomine mondiâl: Josep Colom, che miercus ai 10 al tignarà un conciert che par sigûr al sarà di no podê pierdi. Il pianist spagnûl, aclamât pes interpretazions di Mozart, dal so debut a Parîs intal 1979 al à colezionât premis e ricognossiments, dedicantsi ae ativitât conciertistiche e a chê didatiche. In sale di regjistrazion al à incidût la opare complete di De Falla e Mompo e si dîs che par lui sunâ al sedi naturâl tant che respirâ. Al Palamostre, tacant des 19.22 (il solit orari, che al riclame il 1922, l’an di fondazion dai Amîs de Musiche), al sunarà Chopin, De Nebra, Mozart e Beethoven. (A.I.) – 08.01.2024