Cine mut: a Pordenon si pense za al 2024

Lis Zornadis dal Cine mut no son dome che lis proiezions, ma a son ancje une comunitât che si da adun, dentri e fûr dal Teatri “Verdi”, par discuti e meti in cantîr simpri gnûfs progjets. Cun chestis peraulis di sodisfazion dal diretôr Jay Weissberg, si è sierade la cuarantesime seconde edizion dal festival. Nissun nol varès pensât, intal 1982, che une manifestazion sul cine mut e sarès durade cussì a lunc: a tornâ a dâ vite a chês ombris e je stade une rassegne che e à metût ancje in evidence cemût che il cine dal passât al puedi ancjemò dialogâ cul dì di vuê. A Pordenon, deventade la capitâl di un rinassiment che al è rivât in dut il mont, a son stâts presentâts 153 titui par un public di dute Europe, di curiôs e di passionâts ancje famôs, tant che il regjist John Landis. E cumò al è za il moment di pensâ ae edizion dal an che al ven, dai 5 ai 12 di Otubar dal 2024, dulà che a saran une vore di cines talians in plui. (A.I.) – 16.10.2023