Cuatri dîs a Udin e une ‘code’ in Avost a Vençon pe gnove edizion di AreaDanza_urban dance festival, la rassegne inmaneade de compagnie di danze contemporanie Arearea, che e celebre i trente agns di ativitât. Il calendari di events al permetarà ai danzadôrs di Arearea di tornâ tai lûcs plui voltis esplorâts. Ogni zornade dal festival, di joibe ai 13 a domenie ai 15, e sarà vierte in place S. Jacum di une danze di insiemi, “Bach to Dance”. Po dopo, varis spetacui – par esempli, il “Bolero” di Ravel, prodot de compagnie furlane e cu la musiche dal vîf dai Radio Zastava -, une mostre (“Divertissement”) inte galarie “Tina Modotti”, tancj ospits e spetacui in dute la citât, dal centri ae perifarie. (A.I.) – 12.07.2023
Fotografie di Alice Durigatto
