Al jere za stât intal Istât 2021, li dal cjamp sportîf di Tarvis. Cumò Manu Chao al torne al “No Borders Music Festival” ai 28 di Lui cuntun conciert esclusîf ai Lâts di Fusinis. La vincjesime novesime edizion dal festival e ospite un artist libar e cence confins, che al rapresente ad implen la nature de rassegne musicâl al confin tra Italie, Austrie e Slovenie. Manu Chao al nas a Parîs di gjenitôrs spagnûi, scjampâts in France de ditature spagnole. Al passe la sô infanzie contornât di artiscj in fuide, a metât agns Otante al fonde la band Mano Negra, intal 1998 al rive al sucès mondiâl cun “Clandestino”, il so debut di solist, che al fronte temis sociâi. Al dì di vuê, Manu Chao al è calcolât un dai artiscj plui libars e mancul conformis aes regulis dal marcjât discografic: une vere icone musicâl e culturâl. (A.I.) – 25.04.2024
Foto di K. Renesi
