“O sin disponibii a fevelâ cun ducj, sperant che sui contignûts e sui programs e sedi la volontât di stâ adun. No volìn, però, fâ une grande ingrumade, dulà che ducj si metin adun dome par costruî alc di alternatîf a cui che al è daûr a guviernâ”. Lu à dit intune interviste a Telefriuli il conseîr regjonâl dal Pat pe Autonomie, Massimo Moretuzzo, candidât al moment plui increditât pe presidence de Regjon pal Centriçampe.
“A son dal sigûr dîs tant intens – al conferme l’esponent dal Pat, dopo la viertidure dal Pd a une candidature civiche – parcè che al mancje pôc timp ae sfide des Regjonâls, duncje bisugne acelerâ. E je stade costituide une prime taule dulà che o sin cjapâts ancje nô dal Pat pe Autonomie e o sin convinçûts che al sedi indispensabil costruî une alternative fuarte e crodibile ae maiorance di cumò che e je daûr a guviernâ la Regjon. Jo o ai dât la mê disponibilitât, intune cun altris, e i dîs che a vegnin a saran intens pe decision dal non”.
La candidature di Moretuzzo e varès di jessi la base par une grande coalizion: “Al è indispensabil rivâ a meti adun ducj chei che a calcolin al sedi necessari costruî une vision divierse. Al è impuartant fâlu cun ducj chei che a crodin e, par chest, si augurìn che a sedin altris fuarcis, politichis civichis e sociâls, che si unissin a cui che al à scomençât za chest percors. Il teme al è chel di passâ lis categoriis classichis de politiche taliane e un pôc stanticis. Lis declarazions di chescj dîs, in particolâr dai rapresentâts dal Tierç Pôl, a van forsit intune direzion divierse. Nô o lassìn lis puartis viertis a ducj, però o cjapìn at che a son sensibilitâts diferentis”. (A.D.G.) -7.01.2023
