Il cuestôr di Udin al à sierât la buteghe Kebab Fè Bontà in vie Rome

Sospindude dal Cuestôr di Udin la licence, par motîfs di ordin e sigurece publiche, dal “Kebab Fè Bontà” in vie Rome, indulà che si comprin pizis e panins cul kebab.

La polizie e veve viodût che inte buteghe a rivavin ogni di’ cetancj clients cognossûts par cuistions di droghe o parcè che usâts a doprâle.

Par esempli, un forest, cuant che i agjents i àn domandât se al ves droghe, al à tirat fûr une dose di cocaine disint che e jere par lui. Tal stes timp, jenfri dai taulins e lis cjadreis che a jerin di fûr dal locâl, i agjents a àn cjatât par tiere ciertis dosis di hashish e cocaine, daspò secuestradis. (a.d.g.) – 06.05.2024