Elezions aministrativis, Centri drete unît in almancul 110 Comuns

Vuê di matine incuintri de maiorance par decidi su lis prossimis elezions aministrativis che intal Friûl-Vignesie Julie a varan di elei 114 sindics. Su lis elezions che a saran sabide ai 8 e domenie ai 9 di Jugn, cence balotazion parcè che ducj i Comuns interessâts a son sot dai 15 mil abitants, il Centri drete al à ratificât lis candidaturis cuasi in ducj i câs cuntune coalizion che si presentarà salde al apontament eletorâl. Pôcs i Comuns indulà che e je ancjemò discussion sui candidâts di proponi: Cjampfuarmit, Pasian di Prât, Gonârs e Grau. Par chescj paîs Lega, Fratelli d’Italia e Forza Italia a àn decidût di inzornâsi la setemane prossime cui referents locâi. (a.d.g.) – 05.04.2024