Confcooperative Fvg e à mandât fûr i dâts su la presince feminine intes 518 cooperativis aderentis ae associazion in regjon e e presente numars che a son di record. A rapresentin il 59% dal totâl, di fat, lis lavoradoris: “Al è un dât tant significatîf: in chescj agns il mont cooperatîf al à dât un contribût impuartant ae cressite de ocupazion feminine”, e comente Mirella Berdini, coordenadore regjonâl di Donne cooperatrici di Confcooperative, che e vierzarà l’incuintri ae presince ancje dal president di Confcooperative Fvg, Daniele Castagnaviz, e dal segretari gjenerâl Nicola Galluà. Impuartant ancje il numar des feminis che, inte nestre regjon, a son presidents di cooperativis: a vuê a rapresentin il 28% dal totâl dai presidents intes cooperativis di Confcooperative.
Fuartis di chescj numars, lis delegadis des cooperativis dal F-Vj si son cjatadis cheste matine inte sede di Confcooperative Fvg, par fâ il pont su la presince feminine intal mont des associazions di imprese e intal mont cooperatîf in particolâr. (a.d.g.) – 19.10.23
