“La Cjargne no pues restâ cence un colegament viari stabil e sigûr cu la Carinzie”. A afermâlu al è Nicola Cescutti, cjâf de Delegazion di Tumieç de Confindustrie di Udin, ribatint cussì ancjemò une volte dute il pinsîr dal teritori dal Friûl de Alte dopo il slac che dai 2 di Dicembar dal 2023 al à fermât la strade dal Pas di Mont Crôs.
“Il slac nol à prejudicât dome in mût impuartant cheste strade, ma ancje la economie de Cjargne, che di chest colegament cu la Val dal Gail e otignive sostent economic pes ativitâts comerciâls, turistichis e di ristorazion des nestris zonis”, al marche Cescutti.
Il cjâf de Delegazion di Tumieç al à volût cussì puartâ ancje la vôs dai Industriâi de Cjargne su la dibisugne che al vegni creât infin un colegament stabil e sigûr cu la cueste Nord des Alps Cjargnelis dilunc de strade statâl 52-bis.
“Cence dubi – al va indevant Cescutti – la realizazion dal tunel e je la soluzion otimâl e necessarie, se si vûl no dome dâ disvilup al teritori cjargnel, ma fermâ il declin demografic e economic continui che la nestre mont e je daûr a patî di cualchi deceni, dant duncje disvilup a dute la regjon. O ricuardi che se cu la strade di cumò a passavin plui o mancul 400 mil veicui ad an, cuntun tunel ‘ndi passaressin almancul il dopli. Al è il moment di cjapâ la oportunitât, chest al è il moment di crodi e di invistî su dut il Friûl-Vignesie Julie”.
“Al è significatîf che sei la Regjon Friûl-Vignesie Julie sei il Land de Carinzie a vedin cjapât daurman a cûr il probleme – al conclût il cjâf de Delegazion di Tumieç dai Industriâi furlans – e mi auguri che si puedi rivâ in timps resonevui ae decision di invistî sul tunel, uniche oportunitât pes nestris ints di mont”. (a.d.g.) – 09.01.2024
