La Regjon e à stanziât 3 milions in 3 agns par iniziativis cuintri la plastiche a benefici des microimpresis regjonâls dal setôr dai esercizis publics.
Il regolament al fisse, in detai, che a son di podê finanziâ par un impuart pâr al 65% de spese ritignude amissibile e fin a un massim di 1.000 euros par ogni esercizi, lis iniziativis indreçadis ae riduzion de produzion dai refudons in plastiche monoûs che a previodin la adozion, inte ativitât di ristorazion, di prodots o dispositîfs sostignibii in maniere ecologjiche in sostituzion di fros, placs, possadis, agjitadôrs di bevandis, imbaladuris di aghe minerâl e altris bevandis, sacuts e contignidôrs par mangjative di puartâ vie.
Lis domandis pal 2023 a van fatis dai 5 ai 23 di Otubar vie Pec ae Cjamare di Cumierç competente, che e procedarà dentri di 90 dîs ae erogazion dal contribût, che al rivuarde ogni sede operative ancje di une stesse piçule imprese de ristorazion. (a.d.g.) – 03.10.23
