Mancul impresis in regjon, par cumò dome sui regjistris

da Alessandro Di Giusto

In Friûl-Vignesie Julie o vin a ce fâ cuntune emoragjie di aziendis, ma dome parcè che al è in cors l’inzornament dai regjistris de Cjamare di Cumierç. La nestre regjon e piert un numar consistent di impresis, che a son mancul di 100 mil, pe precision 99.461. A jerin 115 mil sul principi dai agns Doi mil e 116.497 intal 2006, l’an che lis impresis in regjon a son cressudis di plui.

Câl sec dome in trê mês ancje des impresis ativis: des 89.040 dai 30 di Jugn dal 2022 aes 87.784 dai 30 di Setembar dal 2022, par un totâl di 1.256 impresis di mancul. A son i dâts elaborâts dal Ufici Studis di Confartesanât Impresis di Udin, che al à individuât tant che cause principâl di cheste flession la ativitât di ‘pulizie’ intai regjistris fate des Cjamaris di Cumierç di Pordenon e Udin e de Vignesie Julie.

Nol è duncje un fenomen ancjemò leât ai auments des boletis e dal presit dai materiâi di chescj ultins mês. “No si evidenzie pal moment un alarme causât di une cressite des sieradis di nature conzunturâl”, al sclarìs di fat il Rapuart curât di Nicola Serio, stant che chescj efiets, determinâts dal aument di cumò esponenziâl des boletis eletrichis, se a saran, “a saran visibii in câs intai dâts statistics dal ultin trimestri 2022 e dal prin trimestri dal 2023”. (ADG) – 19.11.2022

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui