Il moment al è complès, ma lis impresis furlanis a son preparadis a frontâlu. “A son rivadis a vuê cuntune licuiditât mai vude inte storie, a àn sierât cu la sproporzion fra mieçs propris e debit bancjari e il deceni di austeritât, a àn operât une selezion darwiniane che e à fat restâ sul marcjât impresis sanis. Une ativitât tant dolorose, che però e je stade fate, e vuê o podìn dî che il deceni neri al è aes spalis: il tiessût des impresis al è tant plui san di chel che al à frontât la crisi dal 2011 indenant, il sisteme di garanziis al à sostignût il procès di cambiament de economie e duncje il compart produtîf al à lis spalis plui fuartis par frontâ lis gnovis complessitâts, che pûr a son”. Al è un cuadri otimistic, cence platâ campanei di alarme su cualchi front, chel segnât di Alessandro Carpinella, espert de Prometeia e docent di Corporate Finance ae Luiss di Rome, clamât vuê (lunis ai 2 di Otubar) de Cjamare di Cumierç Pordenone-Udine par segnâ lis prospetivis pai mês prossims de economie dal F-Vj, su la base dal cuadri di dâts fat di Elisa Qualizza, responsabil dal Centri Studis de Cjamare.
Une riflession impuestade su “un strument di racuelte, coordenament e analisi statistiche – al à comentât il president Giovanni Da Pozzo – che al sarà presentât in maniere periodiche: si tire fûr ogni dì une maree di dâts, cun cadencis diferenziadis, ma e mancje simpri une sintesi, buine invezit par dâ un cuadri il plui pussibil complet, par judânus a capî cemût che e je daûr a lâ la regjon e a vê plui clare la direzion di prospetive che e je daûr a cjapâ la nestre economie. Chest, ancje in graciis dal fat che l’Osservatori al è struturât in mût tâl di confrontâ simpri i dâts a nivel provinciâl e regjonâl cun chei talians, europeans e internazionâls”.
Cjalant ai dâts, al salte fûr che la inflazion in Avost (5,2%) e je calade su base anuâl ancje in F-Vj, in confront a une medie taliane, simpri in calade, ma al 5,4% (dâts Istat). Credit: intai ultins 12 mês i prestits aes impresis in Italie a son lâts jù dal 4,5%, ma in Friûl-Vignesie Julie -elaborazion su dâts Bancje di Italie- a son lâts jù in misure plui grande, ven a stâi mancul 10,1% (a Udin mancul 10,2% e a Pordenon mancul 5,9%). Pil: secont Prometeia, la cressite in F-Vj intal 2023 e sarà in linie cun chê taliane, ven a stâi dal plui 1,1% (ma e jere di plui 3,7% intal 2022), il setôr terziari plui 2,1% e industrie mancul 1,9%, cun Udin al plui 1,5% (plui 2,6% servizis, mancul 1,9% industrie) e Pordenon al plui 0,5% (plui 1,9% servizis, mancul 2% industrie). Interessant se confrontât cu la Eurozone, cuntun Pil gjenerâl calcolât dal Font Monetari Internazionâl a plui 0,9% e cu la Gjermanie uniche a vê segn negatîf (mancul 0,3%).
L’Osservatori su la economie regjonâl al à fat ancje un aprofondiment sui dâts plui resints des impresis. In Italie, intal secont trimestri 2023, lis impresis a son cressudis dal 0,47% a pet dal trimestri di prime, cu lis prestazions miôr dai setôrs leâts ai servizis. In F-Vj la cressite e je in sostance in linie cun chê taliane, o sedi plui 0,46%, cun plui 445 impresis in valôr assolût. Intal specific, a Pordenon si regjistre un plui 0,30% (76 impresis) e a Udin plui 0,46% (218 impresis). “Cemût che o ai vût mût di sotlineâ ancje analizant l’ultin report Excelsior, il dât dai servizis al è clâr – al dîs Da Pozzo –, tant intes gnovis assunzions come apont intal numar des impresis e al evidenzie il cambiament plui significatîf in at inte nestre economie aromai di diviers agns”. (a.d.g.) – 02.10.23
