Il Friûl-Vignesie Julie al torne ae Itb (Internationale Tourismus Boerse) di Berlin, la plui impuartant manifestazion turistiche de Europe, cu la prospetive di continuâ a cressi intun marcjât – chel austriac e todesc – che za intal 2022 al à passât, pe regjon, i nivei dal 2019, an record pre-pandemie. Lis presincis di turiscj todescs e austriacs l’an passât inte nestre regjon a son cressudis dal 12,2% a pet dal 2019 (3.118.662 ospits). La incressite des presincis austriachis e je stade di 138.789 unitâts (8,6%) e chel di presincis todescjis di 201.436 ospits (17,2%).
Intal sotlineâ la impuartance di chescj dâts, l’assessôr regjonâl al Turisim F-Vj, Sergio Bini, al à sclarît che a son daûr a cjapâ sù i risultâts dal lavôr fat intai ultins agns e che “altris ancjemò plui sorprendents si daran dongje intal 2023”.
Ae Itb il Friûl-Vignesie Julie al è presint cun 13 operadôrs dentri dal Paveon Italie, screât vuê dal ministri talian dal Turisim, Daniela Santanché. Ae manifestazion, che si sierarâ joibe ai 9 di Març, a son presints plui di 10 mil espositôrs di 180 Paîs. (A.D.G.) – 07.03.2023
