“E continue ancje intal 2023 la ativitât impuartante che la Regjon e à fat intai ultins cuatri agns, in colaborazion cu lis Agjenziis pal lavôr e cu lis impresis sul front dal ingai di gnûf personâl. I dâts dal ultin trimestri dal 2022, cundut dal periodi dificil, a continuin a fevelâ di numars positîfs sedi a pet des assunzions (plui 14,3%), che aes stabilizazions (plui 55%) dai contrats a timp indeterminât a pet dai trimestris di prime. E je cressude ancje la ocupazion feminine. Risultâts impuartants che a fasin lâ indevant su la strade de colaborazion tra Centris pal implei e Agjenziis pal lavôr par dâ rispuestis concretis ai lavoradôrs e al sisteme des impresis”.
Cun chescj dâts l’assessôr regjonâl al Lavôr Alessia Rosolen e à volût introdusi la presentazion de prime “Dì dal ingai” dal 2023 – promovût de Aministrazion regjonâl in colaborazion cun Adecco F-Vj – che al cjape cuatri impresis impuartantis de provincie di Udin ae ricercje di 90 personis di meti intai lôr reparts produtîfs, intai uficis e intai centris di ricercje.
Lis aziendis coinvoltis a son Biofarma Grup di Merêt di Tombe, specializade in prodots pe salût; Metinvest Trametal Spa di Sant Zorç di Noiâr operative intal setôr metalurgjic; Pmp Pro-Mec Spa di Cosean specializade intes trasmissions mecanichis par machinaris e Sirti di Basilian dal Grup internazionâl che si interesse des rêts di telecomunicazions.
Za di vuê sul sit internet de Regjon Friûl Vignesie Julie e sarà a disposizion il colegament dulà cjatâ dutis lis informazions par candidâsi: il curriculum al varà di jessi mandât dentri dai 31 di Zenâr. La zornade che dilunc di chê i candidâts a podaran cjatâ i responsabii des cuatri aziendis, e je organizade invezit ai 8 di Fevrâr a palaç Belgrât a Udin. (A.D.G.) – 9.01.2023
