Presentât cheste matine il Recruiting Day, la zornade dal reclutament par dîle par furlan, che si tignarà a Tumieç joibe ai 23 di Novembar li dal Teatri comunâl “Luigi Candoni”.
A son plui o mancul 120 lis personis ricercjadis des tredis aziendis dal Friûl de Alte protagonistis de selezion organizade dai Servizis pal Lavôr de Regjon, in colaborazion cu la agjenzie Manpower e Carnia Industrial Park di Damâr.
Tra chestis: Adria Plm, Amb, Aspiag Service, Autogrill, Cfl, Coop Alleanza 3.0, Eurolls, Eurotech, Gruppo Fantoni, Gortani, Ondulati ed imballaggi del Fvg, Prima cassa e Stroili Oro. Par candidâsi bisugne inviâ il curriculum vitae dentri di miercus ai 15 di Novembar ae direzion https://bit.ly/RAFVG2023_RecruitingDayTolmezzo. Simpri a cheste direzion al è pussibil cognossi intal detai lis figuris cirudis.
“Il Recruiting Day – e à sclarît l’assessôr al Lavôr e ae Formazion Alessia Rosolen – e je une grande ocasion pal Friûl de Alte. Un apontament che al fâs part dal pachet di iniziativis che la Direzion Lavôr, i centris pal implei e i Servizis pal Lavôr de Regjon a son daûr a inmaneâ sedi par individuâ lis professionalitâts e lis figuris domandadis dal marcjât che par implementâ, intal ambit dal Pnrr e dal Fonts sociâl european, percors formatîfs rinovâts”. (a.d.g.) – 16.10.23
