Une messe ai 6 di Mai ancje a Milan

Ancje a Milan, te glesie di S. Fedele te place cul stes non, dongje dal Palaç Marino, si fasarà une messe par ricuardâ il taramot. Il dì e la ore, lis 9 sot sere dal 6 di Mai, a son chês dal disastri che al è però ancje sburtât une vore di solidarietât in dut il mont. Ancje lis istituzions, lis associazions e la int di Milan e de Lombardie si mobilitarin, mandant cetantis personis e dut il jutori pussibil. In ricuart dal taramot, il Fogolâr Furlan di Milan, fondât ai 30 di Novembar dal 1946, al celebrarà chei valôrs di solidarietât, invidant no dome i furlans di Milan a partecipâ ae messe, ma ancje ducj chei che, in chel timp come cumò, a sintin di condividi chei valôrs. Cun grande atenzion pe comunitât furlane, l’arcivescul di Milan, Mario Delpini, al sarà a cjâf de celebrazion, adun cun cuatri predis nassûts in Friûl. La prime messe par furlan e fo celebrade te glesie di S. Fedele a Milan tal 1972 e e fo ripetude tai agns dopo, in gracie dal Fogolâr Furlan di Milan e tal 1976 e fo celebrade a Nadâl ancje tal Domo. (A.I.) – 05.05.2026