Il Museu “Gortani” al puarte i scarpets in Brasîl

De Cjargne al Brasîl: il Museu cjargnel di Arts Popolârs “Michele Gortani” di Tumieç al puarte tal mont la sô tradizion che e cjale al avignì te suaze dal progjet “Cognossi il Friûl in Brasîl 2026”, une iniziative promovude de Associazion Friuli nel Mondo, sostignude de Regjon Fvj e coordenade deal circul furlan di Santa Maria adun cui Fogolârs Furlans dal Brasîl. Daspò la esperience internazionâl a Expo Osaka 2025, il Museu al è daûr a vierzi un gnûf cjapitul tal so viaç di promozion culturâl, puartant fûr di chenti no dome la storie de Cjargne e lis sôs lidrîs, ma ancje une vision contemporanie dal so patrimoni etnografic. La esperience e sarà concentrade su lis abilitâts artesanâls da tradizion cjargnele, massime la art dai scarpets, la storiche scarpe furlane fate a man, vuê al centri di un grant progjet di tutele, formazion e inovazion culturâl promovût dal Museu midiant de marche certificade “Scarpetti®” e dal progjet “Casa Gortani – Passâ il futûr”. La esperience e sarà fate in dôs setemanis penzis di viaçs a torzeon in cetancj lûcs cui Fogolârs Furlans, cun incuintris cu lis comunitâts locâls, ma ancje presentazions e visitis culturâls. (A.I.) – 13.05.2026