Vôs di sot tiere a Triest pe Bienâl

Miercus ai 7 a Triest, intai spazis de Kleine Berlin, in vie Fabio Severo devant dal numar 11, e sarà presentade la instalazion clamade “Sot Glas”, union dal tiermin furlan sot cu la peraule slovene glas, vôs, che si podarà visitâ fin ai 11 di Jugn intes galariis soteraniis. La instalazion, ambientade intai cinccent metris dal tunel, e à un significât clâr: riclamâ lis atmosferis e lis carateristichis di un lûc scûr tant che l’incussient de storie coletive des comunitâts che a àn vivût in cheste regjon di confin. Il progjet al è stât comissionât de Fosbury Architecture pal Padiglione Italia de decime otave Mostre internazionâl di architeture de Bienâl di Vignesie. (A.I.) – 06.06.2023

Foto di L. Chiaudano