“Trofeus” coloniâi par screâ il Museu de Storie Naturâl

Dopo vincjecinc agns, il Museu furlan de Storie Naturâl di Udin al torne a vierzi cuntune mostre “provisorie” che e je un pas impuartant tal percors di incressite da istituzion, daspò de scree dai gnûfs spazis dome cualchi setemane indaûr. La mostre “Trofei d’Oltremare: una storia da riscrivere” (Trofeus di là dal mâr: une storie di tonâ a scrivi), vierte dai 4 di Lui e fint ai 22 di Novembar, no je dome une oportunitât par mostrâ i gnûfs spazis, ma e met in evidence ancje lis conessions jenfri la produzion sientifiche, il domini coloniâl, il disfrutament des risorsis e la costruzion di un imagjinari e culturâl. La volontât e je che di fa capî che ancje i museus e la cognossince sientifiche a puedin jessi influençâts de propagande ideologjiche. Il cûr de mostre e je la colezion di Vittorio Tedesco Zammarano: animâi puartâts de Afriche tal vincjesim secul e par agnorums considerâts dome esemplârs biologjics. Daûr di chescj, par altri, e je une realtât complesse: la lôr acuisizion e jere leade in maniere fonde ae logjiche coloniâl de estrazion e al “dirit di possès” su la biodiversitât di altris personis. Ogni toc de colezion di Zammarano al devente cussì il puartadôr di une feride, trasformât di organisim vivent intun trofeu.(A.I.) – 02.07.2026