Intai dîs che si è animade la Capitâl europeane de Culture GO!2025, il Friûl-Vignesie Julie al vierç la sô vetrine speciâl di avigniments a Milan, di lunis ai 10 e fin ai 22 di Fevrâr, intor dal teme dai confins e dal lôr superament. Doi dîs dopo la inaugurazion uficiâl di GO!2025, al partirà “Un viaggio da fare” (Un viaç di fâ), un cartelon di incuintris e dialics intal cûr de citât, fra Place Domo e la Galarie Vittorio Emanuele II, cun cetancj protagoniscj: dal Premi Campiello, Federica Manzon, al fumetist Altan, di Paolo Rumiz a Mauro Covacich, Quirino Principe, Toni Capuozzo, Paolo Possamai, Gian Mario Villalta. E ancjemò: i gnûfs libris di Tullio Avoledo e Greta Sclaunich, i “focus” sul premi Nonino e su Giuseppe Ungaretti, Carlo Michelstaedter, Demetrio Volcic, Tullio Crali e Leonor Fini. E la conte di cemût che un teritori di frontiere si spiegle sul grant schermi cul regjist Gabriele Salvatores. Il program al è par cure di Massimiliano Finazzer Flory e promovût dal Assessorât ae Culture de Regjon autonome Friûl-Vignesie Julie. (A.I.) – 09.02.2025
Foto di A. Frediani
